मेडिकल व्यवसायी दुर्गा प्रसाईंले वर्तमान सरकारले ल्याएको बजेट गरिब र निजी क्षेत्रलाई धराशायी बनाउने षड्यन्त्र भएको आरोप लगाएका छन्। शनिबार काठमाडौंमा पत्रकार सम्मेलन गर्दै प्रसाईंले बजेट धनी वर्गलाई मात्र लक्षित रहेको दाबी गरे ।
उनले स्वास्थ्य र शिक्षा क्षेत्रमा लगाइएको मूल्य अभिवृद्धि कर (भ्याट) को चर्को विरोध गरे । ‘गरिब जनताको उपचार गर्ने अस्पताल र विद्यालयमा भ्याट लगाउनु अपराध हो । सरकारले निजी क्षेत्रलाई सिध्याउन खोजेको छ,’ उनले भने । प्रसाईंले आफू सञ्चालित संस्थाहरूले १० प्रतिशत बिरामीलाई निःशुल्क सेवा दिँदै आएको स्मरण गराउँदै राज्यले यस्तो सुविधा खोस्न नहुने तर्क गरे ।
सरकारले आकस्मिक बाहेकका स्वास्थ्य बीमा सेवा स्थगित गरेकोमा पनि उनले असन्तुष्टि जनाए । सुरक्षाकर्मी र निजामती कर्मचारीको तलब वृद्धि अत्यन्तै न्यून भएको उल्लेख गर्दै उनले महिनाको जम्मा २८ हजार तलबले केही गतिलो किन्न नसकिने गुनासो गरे ।
‘मेरो हस्पिटलमा लासबाट पैसा उठाएर, बिरामीबाट पैसा उठाएर पनि म भ्याट बुझाउँछु ? बरु हस्पिटल बन्द गर्दिन्छु,’ प्रसाईंले आक्रोश पोखे ।
देशको आर्थिक अवस्थाप्रति चिन्ता व्यक्त गर्दै उनले २१ खर्बको बजेटको आकार र राज्यको आम्दानीबीच ठूलो अन्तर रहेको बताए । प्रधानमन्त्री बालेन्द्र शाहप्रति लक्षित टिप्पणी गर्दै प्रसाईंले सुकुम्बासी बस्ती हटाउने अभियानको पनि आलोचना गरे । खोला किनार र सार्वजनिक जग्गामा बसोबास गर्दै आएका भूमिहीन तथा विपन्न नागरिकहरूको आवास भत्काइएकोमा उनले असन्तुष्टि जनाए ।
प्रसाईंले वर्तमान सरकारको आर्थिक नीति, राजस्व संकलन क्षमता तथा सार्वजनिक खर्च व्यवस्थापनमाथि पनि प्रश्न उठाए । सरकारले व्यावहारिक आर्थिक योजना ल्याउन नसकेको आरोप लगाउँदै उनले बजेटको आकार र राज्यको आम्दानीबीच ठूलो अन्तर रहेको दाबी गरे ।
