प्रतिनिधिसभामा आगामी आर्थिक वर्ष २०८३/०८४ को बजेटमाथिको सामान्य छलफल सुरु भएको छ। प्रधानमन्त्री बालेन्द्र शाहको सीमासम्बन्धी विवादित अभिव्यक्तिका कारण अवरुद्ध सदनमा बुधबार परराष्ट्रमन्त्री शिशिर खनालले स्पष्टीकरण दिएपछि बजेटमाथिको सैद्धान्तिक छलफलको बाटो खुलेको हो।
अर्थमन्त्री डा. स्वर्णिम वाग्लेले गत जेठ १५ गते संसद्मा प्रस्तुत गरेको राजस्व र व्ययको वार्षिक अनुमानमाथि बुधबारदेखि सामान्य छलफल सुरु भएको छ। जेठ १७ गते प्रधानमन्त्री शाहले ‘नेपालले पनि भारतको भूमि मिचेको रहेछ’ भन्ने अभिव्यक्ति दिएपछि विपक्षी दलहरूले सदन अवरोध गरेका थिए।
बुधबारको बैठकमा परराष्ट्रमन्त्री खनालले प्रधानमन्त्रीको टिप्पणी प्राविधिक सन्दर्भमा आएको भन्दै स्पष्टीकरण दिए। मन्त्रीको जवाफपछि विपक्षी दलका नेताहरूले प्रधानमन्त्रीको विवादास्पद अभिव्यक्ति संसद्को रेकर्डबाट हटाउनुपर्ने माग राखेका छन्। उनीहरूले राष्ट्रियता जस्तो संवेदनशील विषयमा कार्यपालिका प्रमुखको गैरजिम्मेवार अभिव्यक्ति अभिलेखमा रहन नहुने तर्क गरे।
बजेट छलफल सुरु हुनुअघि श्रम संस्कृति पार्टीका अध्यक्ष एवं सांसद हर्क साम्पाङले बोल्न समय माग गर्दा सभामुख डोलप्रसाद अर्यालले समय नदिएपछि सांसदहरूले ‘वेल’ घेराउ गर्दै नाराबाजी सुरु गरेका थिए।
सभामुख अर्यालले सांसदहरूलाई मर्यादित भई सिटमा बसेपछि मात्र समय दिने अडान लिएपछि स्थिति सामान्य बन्यो। साम्पाङले रोष्टममा पुगेर धारणा राखेपछि सभामुखले बजेटमाथिको छलफल अघि बढाए।
सभामुख अर्यालले राजस्व र व्ययको वार्षिक अनुमानमाथि सैद्धान्तिक छलफल हुने जानकारी दिए। उनले मन्त्रालयगत कार्यक्रमबारे विनियोजन विधेयकमा विस्तृत छलफल हुने बताए। छलफलका लागि चार घण्टाको समय निर्धारण गरिएको छ।
सभामुख अर्यालले राष्ट्रपति कार्यालयबाट प्राप्त मन्त्रिपरिषद् हेरफेर र प्रधानमन्त्री तथा मन्त्रिपरिषद् कार्यालयबाट प्राप्त कार्यभार थपसम्बन्धी पत्रको व्यहोरा सुनाए। उनले कार्यव्यवस्था परामर्श समिति र विषयगत समितिमा सदस्य हेरफेरबारे जानकारी गराए, जसमा सभाले सहमति जनायो। सभामुखले ‘वैकल्पिक विकास वित्त परिचालन विधेयक, २०८२’ राष्ट्रियसभाबाट समयभित्र फिर्ता नभएको जानकारी पनि दिए।
अर्थमन्त्री वाग्लेले प्रस्तुत गरेको बजेटमाथि अब सांसदहरूले दफावार धारणा राख्नेछन्। बैठकमा अर्थमन्त्री वाग्लेले छलफलका क्रममा उठेका प्रश्नको जवाफ दिने कार्यक्रम छ।
