सार्वजनिक खरिद ऐनले विपद् व्यवस्थापनका लागि आवश्यक उपकरण खरिद प्रक्रियामा बाधा पुर्याएको गृहमन्त्री सुदन गुरुङले बताएका छन्। राज्य व्यवस्था तथा सुशासन समितिको बैठकमा उनले ऐनका कारण खरिदमा ढिलाइ हुने गरेको उल्लेख गरे।
विश्व बजारमा आधुनिक उपकरण उपलब्ध भए पनि मनसुन सुरु हुनुअघि खरिद प्रक्रिया नसकिने समस्या छ। गृहमन्त्री गुरुङले भने, “२०० किलो तौल बोक्न सक्ने ड्रोन उपलब्ध छन्। तर, सार्वजनिक खरिद ऐनले ४५ दिनभन्दा बढी लगाउँछ। प्रक्रिया सकिँदा मनसुन सकिन्छ।”
उनले नागरिक सेवामा दशक बिताएको स्मरण गर्दै सिन्धुपाल्चोक र काभ्रेपलाञ्चोकमा उच्च क्षमताको ड्रोन प्रयोग गरी पहिलोपटक राहत वितरण गरेको जानकारी दिए। काठमाडौं उपत्यकाका नदी किनारका बासिन्दालाई सुरक्षित स्थानमा सारिएको छ। उनीहरूलाई होल्डिङ सेन्टरमा राखिएको छ।
