सिन्धुलीको भिमानमा ६ ग्राम ५६० मिलिग्राम खैरो हेरोइनसहित रवि यादव पक्राउ परेका छन्। लागूऔषध नियन्त्रण ब्यूरो बर्दीबासबाट खटिएको प्रहरीले जनकपुरबाट काठमाडौंतर्फ जाँदै गरेको मोटरसाइकलमा उनलाई फेला पारेको हो। सोही स्थानमा १ सय ५० मिलिग्राम हेरोइनसहित उदयपुरका मोहन बुढाथोकी पनि पक्राउ परेका छन्।
बाँकेको कैरातीपुरमा १ सय ५० मिलिग्राम ब्राउनसुगरसहित सुवास कुमार गडरिया पक्राउ परेका छन्। प्रहरी चौकी गनापुरले उनलाई नियन्त्रणमा लिएको हो। मोरङको टंकी चोकबाट २ ग्राम २ मिलिग्राम खैरो हेरोइनसहित सुनसरीका इक्रामुल जट पक्राउ परेका छन्।
नवलपरासी पूर्वको कावासोतीमा ३१ डाइजेपाम, १६ फेनारगन र ४० बुप्रेनोर्फिन एम्पुलसहित चितवनका विवेक थापा पक्राउ परेका छन्। अस्थायी प्रहरी पोष्ट दलदलेले स्कुटरमा सवार थापालाई नियन्त्रणमा लिएको हो।
रौतहटको गौरमा करिब ५ किलो ५५ ग्राम गाँजासहित राकेश कुश्वाहा र सुनिल कुमार बैठा पक्राउ परेका छन्। जिल्ला प्रहरी कार्यालय रौतहटले मोटरसाइकलमा सवार उनीहरूलाई नियन्त्रणमा लिएको हो।
कैलालीको त्रिनगर ब्यारेलबाट ४ ग्राम ४६० मिलिग्राम ब्राउनसुगरसहित बाजुराका नरेन्द्र बहादुर शाह पक्राउ परेका छन्। सिराहाको सुखीपुर बजारबाट २० किलो ८९० ग्राम गाँजासहित धनगढीमाइका उमेश कुमार आले मगर पक्राउ परेका छन्।
सुनसरीको इनरूवा बसचोकबाट ५ ग्राम ७७० मिलिग्राम ब्राउनसुगरसहित नितेश चौधरी, अर्पन राई र मिलन कुमार चौधरी पक्राउ परेका छन्।
