भोटेकोशी बाढीले बगाएका शवहरूको व्यवस्थापन सरकारका लागि ठूलो चुनौती बनेको छ। शवहरू कुहिन थालेपछि जनस्वास्थ्यमा गम्भीर असर पर्न सक्ने भन्दै सरकारले तत्काल फ्रिजर र डीएनए परीक्षण किट उपलब्ध गराउन अन्तर्राष्ट्रिय समुदायसँग सहयोग मागेको छ।
परराष्ट्र मन्त्रालयका सचिव अमृतबहादुर राईले आइतबारको पत्रकार सम्मेलनमा शव व्यवस्थापनका लागि कम्तीमा एक हजार जनासम्मको क्षमता भएको फ्रिजर र पर्याप्त डीएनए परीक्षण किटको तत्काल आवश्यकता औंल्याए। उद्धार तथा राहत कार्यमा करिब १९ हजार सुरक्षाकर्मी र १६ हेलिकप्टर परिचालन गरिएको छ।
भारत, चीन र दक्षिण कोरियाका सुरुङ उद्धार विज्ञहरूले बाढी प्रभावित क्षेत्रमा फसेका व्यक्तिको उद्धार गरिरहेका छन्। पहिचान हुन नसकेका, क्षतविक्षत तथा सड्न थालेका शवबाट अन्तर्राष्ट्रिय रेडक्रसको मापदण्डअनुसार डीएनए नमुना संकलन गरी अस्थायी गाड्ने व्यवस्था मिलाइएको छ। परिवारले चाहेमा पछि पहिचान र धार्मिक संस्कारका लागि शव निकाल्न सकिने सचिव राईले बताए।
हालसम्म ७३४ शव फेला परेका छन्। करिब दुई हजार ४९८ जना अझै सम्पर्कविहीन छन्। आठ हजार १८६ नागरिकको उद्धार गरिएको छ, जसमा २६१ विदेशी नागरिक छन्। चार सयभन्दा बढी विदेशी नागरिक अझै बेपत्ता रहेको मन्त्रालयले जनाएको छ।
दुई हजार वटा एयरटाइट ब्याग प्राप्त भइसकेको छ। भारतका १८ जना फरेन्सिक विशेषज्ञहरूको टोलीले डीएनए विश्लेषणमा सहयोग गरिरहेको छ। सरकारले अस्ट्रेलिया, खाडी मुलुक, युरोपेली संघलगायत विभिन्न देशसँग फ्रिजर तथा डीएनए परीक्षण सामग्रीका लागि सहयोग मागेको छ।
