बारा: जीतपुर–सिमरा उपमहानगरपालिकामा पछिल्लो समय ‘जेनजी’ (Gen Z) समूहका युवाहरूको नाममा जनप्रतिनिधि तथा कर्मचारीहरूमाथि आक्रमण र दुर्व्यवहार बढेपछि सेवा प्रवाह नै ठप्प हुन थालेको छ।
सुरक्षाको कारण देखाउँदै वडा नम्बर २० को वडा कार्यालय एक सातादेखि पूर्ण रूपमा बन्द छ। वडाध्यक्ष, वडासचिव र कर्मचारीहरूले शान्ति सुरक्षाको ग्यारेन्टी नभएसम्म काममा फर्कन नसकिने अडान लिएका छन्।
के हो विवादको चुरो?
वडाध्यक्ष रसुलमियाँ अन्सारीका अनुसार, स्थानीय शम्भु यादवको नेतृत्वमा आएका करिब ५०/६० जना युवाहरूको समूहले एक्कासि वडा कार्यालयमा प्रवेश गरी तोडफोड मच्चाएका थिए। उनीहरूले जीर्ण शौचालय, नाला सरसफाइको भुक्तानी, स्वास्थ्य चौकी सञ्चालन र मसानघाटको जग्गा अतिक्रमणको विषय उठाए पनि सामान्य छलफल नगरी सोझै हातपात र तोडफोडमा उत्रिएको वडाध्यक्षको दाबी छ।
“हामी मानसिक रूपमा एकदमै त्रसित छौँ। जेनजीको नाममा त्रास फैलाउने काम भएको छ,” अन्सारीले भने, “शान्ति सुरक्षाको ग्यारेन्टी नभएसम्म सेवा सुरु गर्न सकिँदैन।” वडासचिव हरिकिशोर साहले पनि जिउज्यानभन्दा जागिर ठूलो नभएको भन्दै सुरक्षा माग गरेका छन्।
उपमहानगरको कार्यपालिका बैठकमै उठ्यो प्रश्न
यो समस्या वडा नम्बर २० मा मात्र सीमित छैन। बिहीबार बसेको कार्यपालिका बैठकमा वडा नम्बर १३ का वडाध्यक्ष हेमनारायण चौधरी र वडा नम्बर २ का धनबहादुर श्रेष्ठलगायत आधा दर्जनभन्दा बढी वडाध्यक्षहरूले जेनजी युवाहरूबाट धम्की आउने गरेको र असुरक्षित महसुस भएको गुनासो राखेका छन्।
नगरप्रमुख राजन पौडेलले सामाजिक सञ्जालमार्फत नै जनप्रतिनिधिलाई सुरक्षित वातावरण बनाइदिन स्थानीय प्रशासन र केन्द्र सरकारसँग आग्रह गरेका छन्। यसअघि भदौमा भएको जेनजी आन्दोलनका कारण पनि उपमहानगरका आधा दर्जन वडा कार्यालयहरू क्षतिग्रस्त भएका थिए, जसका कारण ऊर्जावान् जनप्रतिनिधिहरूसमेत निराश बनेका छन्।
यता, प्रमुख जिल्ला अधिकारी (प्रजिअ) धर्मेन्द्र कुमार मिश्रले भने असुरक्षाको कारण वडा बन्द भएको विषय आफूलाई औपचारिक रूपमा जानकारी नभएको बताएका छन्। उनले पालिकाबाट तोडफोडको पत्र मात्र आएको र अब यसबारे बुझ्ने प्रतिक्रिया दिएका छन्। अर्कोतर्फ, राष्ट्रिय स्वतन्त्र पार्टी (रास्वपा) का नगर अध्यक्ष सुरेश केसीले पार्टीको नाम जोडेर अराजकता मच्चाउनेहरूलाई कारबाही गरिने चेतावनी दिएका छन्।
