प्रशान्त महासागरमा विकसित भइरहेको ‘एल निनो’को प्रभावले यस वर्ष नेपालको मनसुन आगमनमा ढिलाइ हुने देखिएको छ । जल तथा मौसम विज्ञान विभागले मनसुन भित्रिन अझै केही दिन लाग्ने जनाएको छ । सामान्यतया जुन १३ मा आइपुग्ने मनसुन यस वर्ष हालसम्म सक्रिय भएको छैन ।
भू-उपग्रह तथ्यांक र गणितीय मौसम पूर्वानुमान विश्लेषणले मनसुन ढिलाइ हुने सम्भावना देखाएको विभागकी प्रवक्ता विभूति पोखेलले बताइन् । ‘एल निनो’ अझ बलियो बन्दै गए यस वर्षको मनसुन कमजोर हुन सक्ने सम्भावना छ । विगतका वर्षहरूमा पनि ‘एल निनो’कै कारण मनसुन आगमन ढिलो भएको तथ्यांक छ ।
यद्यपि, हाल पश्चिमी र स्थानीय वायुको प्रभावले कोशी, बागमती र गण्डकी प्रदेशका हिमाली तथा पहाडी क्षेत्रमा मेघ गर्जनसहित मध्यम वर्षा भइरहेको छ । विभागले मनसुनी प्रणालीलाई निरन्तर अनुगमन गरिरहेको जनाएको छ ।
