राष्ट्रिय स्वतन्त्र पार्टी (रास्वपा) की सांसद शोभा खनालले किसानलाई पर्याप्त रासायनिक मल उपलब्ध गराउन सरकारसँग माग गरेकी छिन्। बुधबार प्रतिनिधिसभा बैठकमा बोल्दै उनले मल अभावले किसानले व्यहोर्नुपरेको समस्याप्रति सरकारको ध्यानाकर्षण गराइन्।
सांसद खनालले मलको अभावले उत्पादनमा कमी आउने, किसानको लागत बढ्ने र खाद्य सुरक्षामा असर पर्ने अवस्था सृजना भएको बताइन्। उनले सभामुखमार्फत गोरखा जिल्ला लगायत सबै स्थानमा मल आपूर्ति सुनिश्चित गर्न आग्रह गरिन्।
खेतीको महत्वपूर्ण समयमा किसानले मल अभाव व्यहोर्दा पनि सरकारले समस्या समाधानमा चासो नदिएको उनको गुनासो थियो। उनले रासायनिक मल वितरण प्रक्रिया पारदर्शी बनाउन सरकारलाई सचेत गराइन्।
“किसानहरू खेतीपातीको महत्वपूर्ण समयमा रासायनिक मलको अभावले छटपटाइरहेका छन्। उहाँहरूको समस्या कसले बुझिदिने?” उनले प्रश्न गरिन्। नेपालमा ६० देखि ९१ प्रतिशत श्रम शक्ति कृषि क्षेत्रमा रहेको तथ्यांक प्रस्तुत गर्दै उनले धान रोपाईंको मुख्य समयमा किसानले मल नपाउनु दुखद भएको बताइन्।
