रसुवा–भोटेकोशी बाढीपछि सुरुङमा फसेका व्यक्तिको उद्धारमा सरकारले पर्याप्त तत्परता नदेखाएको राप्रपा सांसद ज्ञानबहादुर शाहीले आरोप लगाएका छन्। मंगलबार प्रतिनिधिसभाको विशेष समयमा बोल्दै शाहीले सुरुङभित्र फसेका मानिसको उद्धारमा ढिलाइ गर्नु राज्यको कमजोरी भएको बताए।
शाहीका अनुसार, सुरुङभित्र मानिस फसेको जानकारी आफूहरूले घटनाको चार घण्टामै सरकारलाई गराएका थिए। १२ घण्टाभित्र गृहमन्त्रीसँग बसेर उद्धारका लागि आग्रह गर्दा पनि उद्धार सुरु गर्न २६४ घण्टासम्म लागेको उनको दाबी छ।
‘सुरुङभित्र फसेका मानिसहरू एउटा सानो आशा बोकेर बसेका थिए, सरकार आउँछ, मेरा मान्छे आउँछन् र मलाई बचाउँछन् भनेर,’ शाहीले भने।
शाहीले सरकारले उद्धारका लागि सुरुङ विज्ञसँग परामर्श नगरेको, निजी क्षेत्रको सहयोग नलिएको तथा विदेशी उद्धार टोली नबोलाएको आरोप लगाए। आवश्यक उपकरण ल्याउन समेत ढिलाइ भएको उनको भनाइ छ।
उनले जुम्लामा २०० मिटर लामो सुरुङभित्र फसेका चार जना व्यक्ति ४८ घण्टाभित्र जीवितै बाहिरिएको घटना स्मरण गराए। त्यस घटनाले सुरुङभित्र उद्धार सम्भव रहेको प्रमाण दिएको थियो।
‘त्यहाँ जीवन थियो, त्यहाँ सास थियो, त्यहाँ उद्धारको सम्भावना थियो। तर सरकारले उनीहरूसँग सामान्य कुरा पनि सुनेन,’ उनले भने।
शाहीले सात दिनपछि मात्रै उपकरण सुरुङको मुखमा पुगेको भन्दै त्यस अवधिलाई सम्भावित जीवन बचाउन गुमेको समय माने।
‘हामीले त्यहाँ केवल सात दिन गुमाएका थिएनौँ, हामीले सम्भावित जीवनका सात दिन गुमाएका थियौँ,’ उनले भने।
शाहीले सुरुङ खुले पनि परिवारका सदस्यहरू घर फर्कन नसकेको र शवहरू मात्रै बाहिर निकालिएको बताए। उनले आफ्नो परिवारका सदस्यसमेत सुरुङभित्र फसेको उल्लेख गर्दै उद्धारको आशा कमजोर बन्दै गएको सुनाए।
उनले राज्यसँग ठूलो सुरक्षा जनशक्ति, सरकारी संयन्त्र र पर्याप्त आर्थिक स्रोत हुँदाहुँदै पनि सांसदहरूले व्यक्तिगत प्रयासबाहेक राज्यका संयन्त्र परिचालन गर्न नसक्ने बताए। सरकारलाई उपलब्ध स्रोतसाधन प्रयोग गर्न, आवश्यक परे विदेशबाट विशेषज्ञ तथा उपकरण ल्याउन र मानिसको सास बाँकी हुँदासम्म उद्धारमा पुग्न आग्रह गरेको उनको भनाइ थियो।
शाहीले आफ्नो अभिव्यक्ति राजनीतिक स्वार्थका लागि नभएको स्पष्ट पारे। ‘यो सत्ता पक्ष र प्रतिपक्षको प्रश्न होइन। मान्छेको सास बाँकी हुँदा राज्य किन पुगेन?’ उनले प्रश्न गरे।
उनले सुरुङभित्र रहेका मानिसको उद्धार सम्भव रहेको समयमा काम नहुँदा सरकारको उद्धार व्यवस्थापनमाथि गम्भीर प्रश्न उठाए। ‘सरकारले सुरुङभित्र मान्छेको हत्या गर्यो,’ उनले भने।
