राष्ट्रिय स्वतन्त्र पार्टी (रास्वपा) को बागमती प्रदेश अधिवेशन मतदाता नामावली विवादले स्थगित भएको छ। निर्वाचन समितिले बुधबार बिहान मतदान प्रक्रिया सुरु गरे पनि प्रतिनिधिहरूबीच नामावलीलाई लिएर असन्तुष्टि चर्कियो।
अधिवेशनस्थलमा मतदाता सूचीमा समावेश गरिएका तथा छुटेका नामबारे प्रश्न उठेपछि विवाद चर्किएको थियो। निर्वाचन समितिले निर्वाचनसम्बन्धी सम्पूर्ण कार्यक्रम स्थगित गर्दै कार्यक्रमस्थल खाली गर्न निर्देशन दियो।
प्रतिनिधिहरू मंगलबार बेलुकादेखि मतदानमा सहभागी हुन उपस्थित भएका थिए। प्रारम्भिक तालिकाअनुसार मतदान हुन नसकेपछि बुधबार बिहान ८ बजेदेखि प्रक्रिया अघि बढाइने भनिएको थियो। तर अन्तिम मतदाता नामावलीमा विवाद उत्पन्न भएपछि निर्वाचन प्रक्रिया स्थगित गरियो।
रास्वपाको संगठन विस्तार अभियानअन्तर्गत प्रदेश अधिवेशनहरू सञ्चालन भइरहेका बेला बागमती प्रदेश अधिवेशन स्थगित भएको हो।
