सङ्खुवासभाको मकालु गाउँपालिका–३ हेदाङ्नामा भन्सार छली गरी ल्याइएको रु पाँच लाख ५० हजार मूल्य बराबरको ३६८ वटा चौँरीको पुच्छरसहित प्रहरीले एक ट्याक्टर नियन्त्रणमा लिएको छ।
जिल्ला प्रहरी कार्यालय सङ्खुवासभाका प्रहरी निरीक्षक धनबहादुर राजवंशीका अनुसार उत्तरी क्षेत्रको किमाथाङ्का नाकाबाट अवैध रुपमा भन्सार छलेर ल्याइएका चौँरीका पुच्छर उक्त ट्याक्टरमा फेला परेका हुन्।
इलाका प्रहरी कार्यालय हेदाङ्नागढीको टोलीले कोशी राजमार्गअन्तर्गत खाँदबारी–किमाथाङ्का सडकखण्डको हेदाङ्ना चेकपोष्टमा रोकेर जाँच गर्ने क्रममा यो अवैध सामान फेला पारेको हो। भोटखोला गाउँपालिकाको हुङ्गुङबाट खाँदबारीतर्फ आउँदै गरेको प्रदेश १–०२–००३ त १२१७ नम्बरको ट्याक्टर नियन्त्रणमा लिइएको छ।
घटनामा संलग्न भएको आरोपमा प्रहरीले ट्याक्टर चालक चिचिला गाउँपालिका–१ निवासी २० वर्षीय दिनेश राईलाई नियन्त्रणमा लिएको छ।
भन्सार छली ल्याइएको चौँरीको पुच्छर कसको हो भन्नेबारे अनुसन्धान भइरहेको प्रहरीले जनाएको छ। नियन्त्रणमा लिइएको अवैध चौँरीको पुच्छर र ट्याक्टर किमाथाङ्का भन्सार कार्यालय खाँदबारीमा बुझाइएको छ।
इलाका प्रहरी कार्यालय हेदाङ्नाको गस्ती टोलीले थप अनुसन्धान तथा आवश्यक कानुनी प्रक्रिया अघि बढाएको छ।
