नेपाली कांग्रेसका पूर्वमहामन्त्री डा. शशांक कोइरालाले पार्टी फुटिसकेको बताएका छन्। उनले आइतबार विराटनगरमा आयोजित संस्थापन इतर पक्षको भेलामा बोल्दै पार्टीलाई एकताबद्ध बनाएर अघि बढ्नुपर्नेमा जोड दिए।
कोइरालाले विगतको तुलनामा पार्टी कमजोर भएको र यसको मुख्य कारण विभाजन भएको उल्लेख गरे। उनले कोइराला निवासको अवस्था देखेर आफू भावुक भएको र पार्टीको वर्तमान अवस्थाले आँशु आएको बताए। ‘अदालतले टुक्रा बनायो, यो गलत थियो,’ उनले भने, ‘अब पार्टी एकता गरेर अघि बढ्नुपर्छ।’
उनले नेपाली कांग्रेसका नेता गगन थापाको कार्यशैलीप्रति पनि प्रश्न उठाए। ‘के गगन थापाले एक्लै पार्टी चलाउन सक्नुहुन्छ ?’ उनले प्रश्न गरे, ‘सबै नेताहरूलाई एकातिर पन्छाएर एक्लै हिँड्न खोज्नु भ्रम मात्रै हो।’
डा. कोइरालाले २०४८ सालमा गिरिजाप्रसाद कोइरालाको नेतृत्वमा मुलुकले विकासको ठूलो फड्को मारेको स्मरण गर्दै अहिलेको नेतृत्वले बाटो बिराएको आरोप लगाए। उनले पार्टीभित्रको आन्तरिक कलह र विभाजनले लोकतन्त्र र राष्ट्रमै नकारात्मक असर परेको बताए।
उनले सर्वोच्च अदालतको निर्णयले पार्टी विभाजनको अवस्थामा पुगेको र त्यसको सजाय कांग्रेसले भोगिरहेको बताए। गाउँगाउँमा कांग्रेसको जनलहर अझै रहेको दाबी गर्दै उनले पार्टी एकता नहुँदा भोट प्राप्त गर्न नसकिएको स्वीकार गरे। संविधानको रक्षा र राष्ट्रको उज्ज्वल भविष्यका लागि कांग्रेस एक ढिक्का हुनुपर्ने उनको भनाइ थियो।
