चन्द्रपुर नगरपालिका–७ वनबहुअरीकी दुखनी थरुनीले पाँच कठ्ठा जग्गामा तरकारी खेतीबाट दैनिक रु एक हजार ५०० देखि दुई हजारसम्म आम्दानी गर्छिन्। यसले उनको आर्थिक अवस्था सुधार्यो। महिला हिंसा र हकअधिकारबारे उनी सचेत भइन्।
सोही वडाकी दिलकुमारी काफ्लेले बाख्रापालनबाट आर्थिक सबलता पाइन्। सुनिता माझी किराना पसलबाट परिवार पाल्छिन्। राजपुर–९ बैरियाकी मिनादेवी तरकारी खेतीले छोराछोरी पढाउँछिन्। गुलसन खातुन र जरिमा खातुनले टेलरिङ व्यवसायबाट व्यक्तिगत खर्च धान्छन्।
ग्रामीण विकास केन्द्र नेपालको परियोजनाले एक हजारभन्दा बढी महिलालाई स्वरोजगार बनायो। इस्लामिक रिलिफ क्यानाडाको सहयोग र इस्लामिक रिलिफ नेपालको व्यवस्थापनमा यो परियोजना चल्यो। यसले महिला, पुरुष र बालबालिकाको सामाजिक–आर्थिक सशक्तीकरणमा जोड दियो।
परियोजना प्रमुख धर्मेन्द्र साहका अनुसार राजपुर र चन्द्रपुरका १२ वडामा लैङ्गिक हिंसा न्यूनीकरणका कार्यक्रम चलिरहेका छन्। परियोजनाले हिंसाबाट प्रभावित महिलालाई समाजमा पुनःस्थापना गर्ने लक्ष्य राखेको छ।
चन्द्रपुरमा ४३० महिलालाई रु ६५ हजारका दरले व्यवसाय गर्न नगद सहयोग गरियो। राजपुरमा ५८० भन्दा बढी महिलाले सोही सहयोग पाइन्। महिलाको रुचिअनुसारका कार्यक्रमलाई सहयोग पुर्याइएको छ।
सामुदायिक सिकाइ तथा संरक्षण केन्द्र स्थापना गरी लैङ्गिक हिंसा न्यूनीकरणका कार्यक्रम सञ्चालन भइरहेका छन्। चन्द्रपुरका पाँच वडामा १० र राजपुरका सात वडामा १४ यस्ता केन्द्र छन्। दुई हजार ४०० बालबालिकाले जीवनोपयोगी सीप सिके।
महिलालाई व्यवसाय तालिम, वित्तीय साक्षरता र प्रशिक्षण दिइन्छ। पुरुष सदस्यलाई लैङ्गिक हिंसा र महिला अधिकारबारे प्रशिक्षण दिइएको ग्रामीण विकास केन्द्रका अध्यक्ष पारस हुसेनले बताए। समूहका महिलालाई नेतृत्व विकास तालिम प्रदान गरिएको छ।
