देशभरका विभिन्न स्थानमा आएको बाढी र पहिरोका कारण मुख्य राजमार्गहरू अवरुद्ध भएका छन्। नेपाल प्रहरीका अनुसार काठमाडौँ उपत्यका जोड्ने प्रमुख सडकका साथै कोशी र बागमती प्रदेशका दर्जनौं सडक खण्डहरू प्रभावित भएका छन्।
काठमाडौँ भित्रिने र बाहिरिने मुख्य सडक नागढुंगा-मुग्लिन खण्ड बाढीको जोखिमले पूर्ण रूपमा बन्द छ। प्रहरीका अनुसार भाद्र १० गते बिहान १० बजेदेखि यस खण्डमा सवारी आवागमन रोकिएको हो।
बागमती प्रदेशका धेरैजसो राजमार्गमा बाढी र पहिरोको जोखिमले सवारी सञ्चालनमा प्रतिबन्ध लगाइएको छ।
बिपी राजमार्गको खुर्कोट-नेपालथोक-कटुञ्जेबेँसी खण्डमा साँझ ६ बजेदेखि बिहान ४ बजेसम्म सवारी रोकिन्छ। दिउँसोको समयमा स्थितिको आकलन गरेर मात्र सवारी चल्न दिइनेछ।
कान्ति लोकपथको हेटौँडा-ठिङ्गन-बागमती-ललितपुर सडक खण्डमा रातिको समयमा (साँझ ५ बजेदेखि बिहान ५ बजेसम्म) सवारी रोक्ने व्यवस्था छ।
त्रिशूली-मैलुङ-स्याफ्रुबेँसी सडक खण्डको उत्तरगया-५, खाल्टेमा बाढीले बाटो लामो समयदेखि पूर्ण रूपमा अवरुद्ध पारेको छ।
नुवाकोट जाने टोखा-छहरे सडक खण्डमा रातको समयमा सवारी चलाउन रोक लगाइएको छ। जिल्लाका अन्य मुख्य राजमार्ग पनि बाढीले अवरुद्ध छन्।
इलामको मेची राजमार्ग अन्तर्गत राजदुवाली क्षेत्रमा वर्षाले सडक पूर्ण रूपमा अवरुद्ध छ। प्रहरीका अनुसार झापादेखि ताप्लेजुङ जाने यात्रुहरूका लागि वैकल्पिक बाटो उपलब्ध छ।
प्रहरीले यात्रामा निस्कनुअघि सडकको पछिल्लो अवस्थाबारे नजिकको प्रहरी कार्यालयमा जानकारी लिन र जोखिमपूर्ण मौसममा सावधानी अपनाउन सर्वसाधारणलाई आग्रह गरेको छ।
