डिजिटल वालेट ई-सेवाको कर्मचारी बनेर सर्वसाधारणलाई ठगी गर्ने रौतहटका २२ वर्षीय शुभम साह पक्राउ परेका छन्। उनले ई-सेवाबाट बोलेको र अकाउन्टमा धेरै रिवार्ड पोइन्ट रहेको प्रलोभन देखाए। ओटिपी मागेर पीडितको खाताबाट १ लाख ९८ हजार ४ सय ९९ रुपैयाँ ठगी गरेका थिए।
पीडित पक्षका अनुसार साहले ‘याक एन्ड को. इन्टरप्राइजेज’ मा पटक-पटक फोन गरेका थिए। ई–सेवाको अकाउन्ट चेक गर्ने बहानामा ओटिपी प्राप्त गरे। सो रकम ‘इभोलुसन ट्रेडिङ प्राइभेट लिमिटेड’ को ई–सेवा आईडीमा रकमान्तर गरे।
रकम ट्रान्सफर गरेपछि साहले इभोलुसन ट्रेडिङबाट आइफोन–१७ मोबाइल लिएर गए। साइबर ब्युरोको टोलीले साहलाई पक्राउ गर्दा ४ वटा मोबाइल र ४ वटा सिमकार्ड बरामद गर्यो।
साहको साथबाट ठगी प्रयोजनका लागि संकलित १५३ जना सर्वसाधारणको ई–सेवा आईडी र मोबाइल नम्बरको विवरण पनि बरामद भयो।
पक्राउ परेका साहमाथि विद्युतीय माध्यम सम्बद्ध ठगी अपराध मुद्दामा काठमाडौँ जिल्ला अदालतबाट चार दिनको म्याद थप भएको छ। साइबर ब्युरोले उनलाई हिरासतमा राखी अनुसन्धान गरिरहेको छ।
प्रहरीको प्रारम्भिक अनुसन्धानले साह यसअघि पनि दुई पटक यस्तै डिजिटल ठगी मुद्दामा पक्राउ परेको देखायो। उनी अदालतबाट धरौटीमा रिहा भएका थिए।
साइबर ब्युरोका प्रवक्ता प्रहरी उपरीक्षक दिलीप कुमार गिरीले यस्तो ठगीबाट बच्न सर्वसाधारणलाई सचेत गराएका छन्।
