अन्य ६ वटा प्रदेशमा नेपाली कांग्रेस र नेकपा एमालेको गठबन्धन भत्किए पनि मधेस प्रदेशमा यो गठबन्धन कायमै रहने भएको छ। यस गठबन्धनका कारण जनता समाजवादी पार्टी (जसपा) नेपाल सरकार बाहिर बस्ने भएको छ।
मधेस प्रदेश सभामा जसपा नेपाल सबैभन्दा ठूलो दल भए पनि हालको सत्ता गठबन्धनमा सहभागी नहुने निर्णय गरेको छ। जसपा नेपालले अग्रगामी मोर्चामा रहेर सरकारमा नजाने निर्णय गरेको स्रोतले जनाएको छ।
नेपाली कांग्रेसका नेता महेन्द्र यादवले मधेसमा कांग्रेस, एमाले र नेकपाको सरकार रहने दाबी गरे। उनले तीन प्रमुख दल सरकारमा रहेकाले एक बलियो विपक्षी दल आवश्यक पर्ने र सो भूमिकामा जसपा नेपाल रहने बताए। यादवका अनुसार मधेसवादी दलहरूले विगत आठ वर्षदेखि मधेस प्रदेश सरकार चलाउँदा संघीयतामाथि प्रश्न उठेकाले अब कांग्रेस, एमाले र नेकपा मिलेर सरकार चलाउनेछन्।
एमालेका नेता लीलानाथ श्रेष्ठले जसपा नेपाल सरकारमा सहभागी हुन तयार नभएकाले कांग्रेस, एमाले र नेकपा मिलेर सरकार सञ्चालन गरिरहेको बताए। उनले जसपा नेपाल पार्टीभित्रै विवाद रहेको र एकता भए पनि सरकार कसको नेतृत्वमा बनाउने वा सरकारमा जाने कि नजाने भन्ने विषयमा सहमति नभएकाले कांग्रेसको नेतृत्वमा सरकार चलिरहेको स्पष्ट पारे।
श्रेष्ठले सुदूरपश्चिमलगायतका प्रदेशमा कांग्रेसले एकोहोरो ढङ्गले अघि बढ्न खोजेपछि एमाले अर्को गठबन्धन बनाउन बाध्य भएको बताए। तर, कांग्रेस नेता महेन्द्र यादवले भने ठूला दुई दल मिल्दा आलोचना हुने र यो राजनीतिक सिद्धान्त विपरीत पनि भएकाले प्रदेशमा बलियो प्रतिपक्षी होस् भनेर कांग्रेस अलग भएको दाबी गरे।
जसपा नेपाल र लोकतान्त्रिक समाजवादी पार्टी (लोसपा) नेपालबीच एकता भए पनि समायोजनको काम बाँकी रहेकाले र निर्वाचन आयोगबाट आधिकारिक पत्र प्रदेशमा नपुगेकाले सरकार गठनमा झमेला भएको थियो। यसपछि एमालेले कांग्रेसलाई साथ दिने निर्णय गर्यो। केन्द्रमा पनि मधेस प्रदेशको हकमा गठबन्धन नतोड्ने कांग्रेस–एमालेबीच सहमति भएको छ।
यसैबीच, लुम्बिनी प्रदेशमा एमाले नेतृत्वको सरकारमा जसपा नेपालका दुई मन्त्री सहभागी भएका छन्। जसपा नेपालले आफ्ना मन्त्रीहरूलाई सरकारबाट फिर्ता हुन पत्र पठाए पनि उनीहरूले हालसम्म राजीनामा दिएका छैनन्।
