रसुवाको भदौ १० गतेको बाढीले जुम्लाको पातारासी गाउँपालिका–४ लाम्रीका अमर भण्डारी र उनका छोरा अनिललाई बगायो। दुई महिना बितिसक्दा पनि उनीहरूको अत्तोपत्तो छैन। २१ वर्षीया छोरी रिता भण्डारीले बुबा र भाइको अन्तिम अनुहारसमेत हेर्न नपाई कुशको शवलाई आफैंले दागबत्ती दिइन्।
हिन्दू परम्पराअनुसार शव नभेटिए कुशको शव बनाएर दाहसंस्कार गरिन्छ। परिवारले बेपत्ता आफन्तको अवस्थाबारे अन्तिम जवाफ नपाउँदै संस्कार पूरा गर्नुपर्ने बाध्यता भोग्यो। अमर र अनिल बेपत्ता भएपछि घरमा अब छोरी रिता र ४० वर्षीया आमा बाचुकली भण्डारी मात्र छन्।
घरको सहारा गुमेपछि बाचुकलीको सहारा पनि अब छोरी रिता नै बनेकी छन्। बाढी गएको लामो समय बितिसक्दा पनि बेपत्ताको अवस्था पत्ता नलाग्नु परिवारका लागि गहिरो शोक र अनिश्चितताको पीडा बनेको छ। गाउँका युवा कमलबहादुर बुढाका अनुसार शव नपाएपछि कुशको शव बनाएर अन्तिम संस्कार गर्नुपर्ने बाध्यता विपत्तिपछि बेपत्ता नागरिकका परिवारले भोग्ने गम्भीर अवस्था हो।
