त्रिशूली नदीमा आएको भोटेकोशी बाढीले ६६९ जनाको ज्यान लिएको छ। २३०१ जनाको उद्धार गरिएको छ। नेपाल प्रहरीका अनुसार रसुवा, धादिङ, नुवाकोट, गोरखा, तनहुँ, चितवन, नवलपरासी पूर्व र पश्चिमबाट शव फेला परेका छन्।
प्रहरी नायब महानिरीक्षक (डिआइजी) अविनारायण काफ्लेका अनुसार बाढी प्रभावित क्षेत्रबाट हालसम्म दुई हजार ३०१ जनाको उद्धार गरिएको छ। रसुवा, नुवाकोट र धादिङबाट सबैभन्दा बढी उद्धार गरिएको छ। गम्भीर घाइतेलाई थप उपचारका लागि काठमाडौँ ल्याइएको छ।
रसुवामा चिनियाँ जनमुक्ति सेनाका सुरुङ उद्धार विशेषज्ञसहित भारत र चीनका उद्धार टोली सक्रिय भएका छन्। चार दिनपछि रसुवाको टिमुरेमा सात वर्षीया बालिका शिरगङ्गा इचाई मगरको जीवितै उद्धार गरिएको छ। सशस्त्र प्रहरी बल नेपाल २० नम्बर गुल्म धुन्चेको टोलीले बालिकाको उद्धार गरेको हो। गम्भीर घाइते बालिकालाई हेलिकप्टरमार्फत थप उपचारका लागि शिक्षण अस्पताल महाराजगन्ज पठाइएको छ।
संक्रमणको जोखिम घटाउन प्रहरीले बेवारिसे शव व्यवस्थापनको काम तीव्र पारेको छ। गोरखामा भेटिएका २९ शवको अन्त्येष्टि गरिएको छ।
कृषि, वन तथा पर्यावरणमन्त्री गीता चौधरीले बाढी प्रभावित क्षेत्रमा राहत सामग्री तत्काल उपलब्ध गराउने विषयमा सङ्घीय सांसदसँग छलफल गरेकी छन्। उनले प्रभावित नागरिकको आवश्यकता पहिचान गरी राहत सामग्रीको आपूर्ति तथा वितरणलाई व्यवस्थित बनाउने बताइन्।
प्रधानमन्त्री बालेन शाहले सरकारले प्रभावित क्षेत्रमा उद्धार, खोजी र राहत कार्यलाई अहोरात्र तीव्र पारेको बताएका छन्। उनले सामाजिक सञ्जाल फेसबुकमा संघ, प्रदेश र स्थानीय तहका जनप्रतिनिधि तथा कर्मचारीहरूसँगको समन्वयमा काम भइरहेको जानकारी दिएका छन्।
प्रमुख प्रतिपक्षी दल नेपाली कांग्रेसका नेता भीष्मराज आङ्देम्बेले प्रधानमन्त्री बालेन शाहसँग भेट गरी बाढी प्रभावितको उद्धार र राहतका लागि नौ बुँदे ध्यानाकर्षणपत्र बुझाएका छन्। उनले हवाई उद्धारलाई थप प्रभावकारी बनाउन र रसुवा तथा नुवाकोटका लागि छुट्टाछुट्टै हेलिकप्टर उद्धार युनिट परिचालन गर्न माग गरेका छन्।
विनाशकारी बाढीका कारण परराष्ट्रमन्त्री शिशिर खनालको सर्बिया भ्रमण स्थगन भएको छ।
युक्रेनको राजधानी किएभनजिकै रहेको एक डिपोमा रुसले रातभर ड्रोन आक्रमण गरेको छ।
