गण्डकी र लुम्बिनी प्रदेशका केही स्थानमा असोज ९ देखि ११ गतेसम्म मेघगर्जन, चट्याङ्ग र हावाहुरीसहित भारी वर्षा हुनेछ। एक-दुई स्थानमा अति भारी वर्षाको समेत सम्भावना छ। मौसम पूर्वानुमान महाशाखाले सोमबार विशेष मौसमी बुलेटिन जारी गर्दै यो चेतावनी दिएको हो।
बंगालको खाडीमा विकसित शक्तिशाली मौसमी प्रणालीका कारण तीन दिन देशभर विपद्को जोखिम उच्च रहने महाशाखाले जनाएको छ। उत्तर अन्डमान सागर आसपास बनेको न्यून चापीय प्रणाली शक्तिशाली बन्दै डिप डिप्रेसनका रूपमा पश्चिम-उत्तरपश्चिम दिशातर्फ सर्दैछ। यसको प्रभावले बुधबारदेखि नै कोशी, मधेश, बागमती र गण्डकी प्रदेशमा वर्षा सुरु हुनेछ।
मधेश, कोशी, बागमती र सुदूरपश्चिम प्रदेशका थोरै स्थानमा भारीदेखि धेरै भारी वर्षा हुनेछ। कर्णाली प्रदेशका थोरै स्थानमा भारी वर्षाको आकलन गरिएको छ। मुलुकका अधिकांश भूभागमा मध्यम वर्षाको सम्भावना छ।
उच्च हिमाली क्षेत्रमा भारी हिमपातको सम्भावना छ। पर्वतारोही, पदयात्री र सम्बन्धित निकायलाई उच्च सतर्कता अपनाउन आग्रह गरिएको छ।
हाल पाकेको धानबाली भित्र्याउने समय भएकाले किसानहरूलाई मौसमी सूचना र कृषि विज्ञहरूको सल्लाह लिएर मात्र काम गर्न महाशाखाले अनुरोध गरेको छ।
भारी वर्षाले पहिरो, भू-क्षय, गेग्रान बहाव र नदी-खोलामा बाढीको जोखिम बढाएको छ। तराई र सहरी क्षेत्रमा डुबानको समस्या देखिन सक्ने चेतावनी छ।
सडक तथा हवाई यातायात, दैनिक जनजीवन, नदी तटीय क्षेत्रका निर्माण कार्य, कृषि, स्वास्थ्य र पर्यटन क्षेत्र प्रभावित हुन सक्नेछ। आम सर्वसाधारण र सरोकारवाला निकायलाई पूर्वतयारीमा रहन भनिएको छ।
महाशाखाले प्रणालीको निरन्तर अनुगमन गरिरहेको छ। नियमित रूपमा अद्यावधिक मौसमी सूचना लिन आग्रह गरिएको छ।
