हवाई इन्धनको मूल्य झन्डै दोब्बरले वृद्धि: हवाई यात्रा महँगिने निश्चित
नेपाल आयल निगमले हवाई इन्धनको मूल्यमा अहिलेसम्मकै भारी वृद्धि गरेको छ। मंगलबार गरिएको नयाँ मूल्य समायोजनअनुसार आन्तरिक र अन्तर्राष्ट्रिय दुवैतर्फको हवाई इन्धनको मूल्य झन्डै शतप्रतिशत (दोब्बर) ले बढेको हो। यस निर्णयसँगै नेपालको हवाई उडान सेवा र पर्यटन क्षेत्रमा प्रत्यक्ष असर पर्ने देखिएको छ।
आन्तरिकतर्फ प्रतिलिटर १२४ रुपैयाँले बढ्यो निगमले जारी गरेको प्रेस विज्ञप्तिअनुसार, आन्तरिक उडानतर्फ प्रयोग हुने हवाई इन्धनको मूल्य साविकको १२७ रुपैयाँ प्रतिलिटरबाट बढाएर एकैपटक २५१ रुपैयाँ कायम गरिएको छ। इन्धनको मूल्यमा यति ठूलो अन्तरले वृद्धि भएपछि आन्तरिक वायुसेवा कम्पनीहरूले हवाई भाडादर पनि सोही अनुपातमा बढाउने निश्चित छ।
अन्तर्राष्ट्रिय उडानतर्फ पनि अचाक्ली वृद्धि आन्तरिकतर्फ मात्र नभई अन्तर्राष्ट्रिय उडानतर्फ पनि इन्धनको मूल्यमा अत्यधिक वृद्धि भएको छ। काठमाडौंस्थित त्रिभुवन अन्तर्राष्ट्रिय विमानस्थलका लागि इन्धनको मूल्य प्रतिकिलोलिटर ९६६ अमेरिकी डलरबाट बढाएर १ हजार ७८५ डलर पुर्याइएको छ।
पोखरा र भैरहवा विमानस्थलको मूल्य समायोजन निगमका अनुसार देशका अन्य दुई अन्तर्राष्ट्रिय विमानस्थलमा पनि मूल्य समायोजन गरिएको छ। पोखरा क्षेत्रीय अन्तर्राष्ट्रिय विमानस्थलमा यसअघि ८०१ डलर प्रतिकिलोलिटर रहेको मूल्य बढाएर १ हजार ७३२ डलर कायम गरिएको छ।
त्यसैगरी, मधेस-तराईको प्रमुख अन्तर्राष्ट्रिय नाका गौतमबुद्ध अन्तर्राष्ट्रिय विमानस्थल (भैरहवा) मा यसअघि प्रतिकिलोलिटर ७८९ डलरमा कारोबार भइरहेको इन्धनको मूल्य वृद्धि गरी १ हजार ७१६ डलर पुर्याइएको छ।
आम नागरिक र पर्यटनमा प्रभाव इन्धनको मूल्यमा भएको यो अस्वाभाविक वृद्धिसँगै यात्रुहरूको यात्रा लागत ह्वात्तै बढ्नेछ। एकातिर आम नागरिकलाई हवाई यात्रा महँगो सावित हुनेछ भने अर्कोतिर नेपालको समग्र पर्यटन उद्योग र ढुवानी प्रणालीमै यसको नकारात्मक आर्थिक प्रभाव पर्ने सरोकारवालाहरूले बताएका छन्।
