जनआन्दोलन २०६२/६३ को जगमा २०६५ जेठ १५ गते निरंकुश राजतन्त्रको विधिवत् अन्त्य गर्दै नेपालमा संघीय लोकतान्त्रिक गणतन्त्रात्मक शासन व्यवस्था प्रारम्भ भएको दिनको स्मरणमा आज देशभर गणतन्त्र दिवस मनाइँदैछ।
यस ऐतिहासिक दिनको सम्झनामा हरेक वर्ष जेठ १५ गते गणतन्त्र दिवस मनाउने गरिन्छ। यो वंशीय शासनलाई जनताले जितेको उत्सव हो।
यस अवसरमा सैनिक मञ्च टुँडिखेलमा एक विशेष समारोह आयोजना गरिएको छ। समारोहमा राष्ट्रपति रामचन्द्र पौडेल, उपराष्ट्रपति, प्रधानमन्त्री, सभामुख, राष्ट्रियसभाका अध्यक्ष लगायत उच्च पदस्थ व्यक्तित्वहरूको उपस्थिति छ।
समारोहमा नेपाली सेना, नेपाल प्रहरी र सशस्त्र प्रहरी बलका तर्फबाट मार्चपास्ट र विभिन्न सांस्कृतिक झाँकीहरू प्रदर्शन गरिनेछ। गौरवमय परिवर्तनका लागि सहादत प्राप्त गर्ने शहीदप्रति श्रद्धाञ्जलि अर्पण गरिनेछ।
यस वर्षको गणतन्त्र दिवस समारोहलाई राष्ट्रपति रामचन्द्र पौडेलले सम्बोधन गर्ने कार्यक्रम छ। यसअघि प्रधानमन्त्रीले सम्बोधन गर्ने परम्परा थियो। प्रधानमन्त्रीको सचिवालयले उहाँ समारोहमा सहभागी हुने तर सम्बोधन नगर्ने जनाएको छ।
सरकारले गणतन्त्र दिवसको अवसरमा देशभर सार्वजनिक बिदा दिएको छ।
