राष्ट्रिय परीक्षा बोर्डले गत जेठमा प्रकाशित गरेको एसइई नतिजामा गम्भीर लापरबाही गरेको छ। नतिजा प्रकाशित भएपछि फेल भएका विद्यार्थीहरूले पुनर्योग (रिटोटलिङ) का लागि आवेदन दिँदा ठूलो संख्यामा उत्तीर्ण भएको पाइएको छ।
बोर्डले प्रकाशित गरेको नतिजामा चित्त नबुझी पुनर्योगका लागि आवेदन दिएका विद्यार्थीहरूको नतिजा फेरबदल भएको हो। यसले विद्यार्थीहरूको भविष्यमाथि खेलबाड भएको भन्दै गुनासो बढेको छ।
सिम्बोल नम्बर ०३६००२८४ एल भएका एक विद्यार्थीले अनिवार्य नेपाली विषयमा ‘ननग्रेड’ (एनजी) पाएका थिए। तर, पुनर्योगपछि उनले सोही विषयमा १.६ जिपिए प्राप्त गरी पास भएको नतिजा आयो।
यस्तै, सिम्बोल नम्बर ०३६००७२४ जे भएका अर्का विद्यार्थीको पनि नेपाली विषयमा फेल भएको नतिजा पुनर्योगपछि २ जिपिए र सी ग्रेडमा परिणत भएको छ। अर्का एक विद्यार्थीले एनजी पाएकोमा पुनर्योगपछि २.८ जिपिएसहित ‘बी’ ग्रेडमा पास भएका छन्।
बोर्डले यस्तो त्रुटि यसअघि पनि गर्दै आएकोमा यस पटक त्रुटिपूर्ण नतिजाको संख्या झन्डै दोब्बरले बढेको छ। विगत वर्षहरूमा करिब ३ प्रतिशत नतिजा मात्र फेरबदल हुने गरेकोमा यस पटक ५ प्रतिशतभन्दा बढी विद्यार्थीको नतिजा पुनर्योगबाट परिवर्तन भएको छ।
राष्ट्रिय परीक्षा बोर्डले एसइई २०८२ को रिटोटलिङ नतिजा चरणबद्ध रूपमा सार्वजनिक गरिरहेको छ। जेठ १७ गतेदेखि विभिन्न लटमा नतिजा प्रकाशित गर्दै आएको बोर्डले पछिल्लो सातौं लटको नतिजा जेठ ३१ गते सार्वजनिक गरेको थियो।
कुल ३३९ विद्यार्थीले पुनर्योगका लागि आवेदन दिएकामध्ये १८ जनाको नतिजा फेरिएको छ। यसबाहेक पहिलोदेखि सातौं लटसम्म हजारौं विद्यार्थीको नतिजा सार्वजनिक भइसकेको छ।
पद्मकन्या विद्याश्रम मावि, डिल्लीबजारकी प्रिन्सिपल रीता तिवारीका अनुसार रिटोटलिङपछि केही विद्यार्थीको नतिजा सुधार भएको छ भने फेल भएका विद्यार्थी पनि पास भएका छन्। उनले यसपटक छिटो नतिजा प्रकाशन गर्न परीक्षा केन्द्रलाई नै परीक्षण केन्द्र बनाइएको र कतिपय केन्द्रमा त्रुटि भएको बताइन्।
उनले विशेषगरी मधेश प्रदेशमा बढी त्रुटि देखिएको अनुभव सुनाइन्। रिटोटलिङ प्रक्रियामा उत्तरपुस्तिकाको पुनःमूल्याङ्कन नभई परीक्षकले दिएका अंक सही रुपमा जोडिएको छ वा छैन भन्ने मात्र परीक्षण गरिने बोर्डले जनाएको छ।
यस वर्षको एसइई परीक्षामा ४ लाख ३० हजार ६६७ विद्यार्थी सहभागी भएका थिए। जसमध्ये २ लाख ८४ हजार १६० उत्तीर्ण भएका छन् भने १ लाख ४६ हजार ५०७ विद्यार्थी नन-ग्रेडेड (एनजी) भएका थिए।
