कम्युनिस्ट पार्टीले सत्ताभन्दा जनजीविका र विचारलाई प्राथमिकता दिनुपर्छः यादव

जनकपुर । नेपाली कम्युनिस्ट पार्टीका नेता महेन्द्र राय यादवले सत्ता र गठबन्धनको राजनीतिक जोडघटाउभन्दा जनजीविकाका सवाल र वैचारिक संघर्षलाई प्राथमिकता दिनुपर्ने बताएका छन्। शनिवार जनकपुरमा आयोजित एक कार्यक्रममा बोल्दै यादवले कम्युनिस्ट पार्टी जनताको वर्गीय मुक्तिका लागि स्थापना भएको स्मरण गराए। उनले कम्युनिस्ट पार्टीहरू सत्तामा पुग्नका लागि विभिन्न गठबन्धनमा सामेल हुने र चुनाव जितेपछि जनताका मुद्दा भुल्ने प्रवृत्तिप्रति चिन्ता व्यक्त गरे। यादवले कम्युनिस्ट आन्दोलनको मूल उद्देश्य जनताको जीवनस्तर उकास्नु र उनीहरूको अधिकार सुनिश्चित गर्नु भएकोले यसबाट विचलित हुन नहुने बताए। उनले कम्युनिस्ट पार्टीहरूले जनताको दैनिक जीवनमा प्रत्यक्ष असर पार्ने महँगी, बेरोजगारी र सामाजिक न्याय जस्ता मुद्दाहरूलाई बेवास्ता गरी केवल सत्ता प्राप्तिको खेलमा सीमित हुनु जनताप्रतिको विश्वासघात भएको स्पष्ट पारे।