रसुवाका भोटेकोशी र आसपासका नदीमा बाढीले बगाएर ल्याएका माछा नखान र पानी प्रयोग नगर्न प्रहरीले सर्वसाधारणलाई अनुरोध गरेको छ। नदीहरू अत्यधिक दूषित भएकाले स्वास्थ्य जोखिम बढेको प्रहरीले जनाएको छ।
बाढीसँगै मानव शव, मृत जीवजन्तु र फोहोर नदीमा मिसिएका छन्। यसले पानी र माछामा घातक कीटाणुहरू प्रवेश गरेको छ।
सुरक्षाकर्मीहरूले प्रभावित क्षेत्रमा माइकिङ गर्दै नदी किनारबाट माछा नसमात्न आग्रह गरिरहेका छन्।
दूषित पानी र खाद्यपदार्थले हैजा, झाडापखाला, छालासम्बन्धी संक्रमणजस्ता महामारी फैलाउने उच्च जोखिम रहेको प्रहरीले चेतावनी दिएको छ।
स्वास्थ्य संकटबाट बच्न नदीका माछा नखान र पानी नपिउन तटीय क्षेत्रका बासिन्दालाई सतर्क रहन अनुरोध गरिएको छ।
