राजविराजस्थित गजेन्द्रनारायण सिंह सगरमाथा अस्पतालले पैसा नहुँदा एक विपन्न महिलालाई भर्ना नलिएपछि उनले अस्पतालको फुटपाथमै शिशुलाई जन्म दिनुपरेको छ। २५ भदौको बिहान करिब २:३० बजे सुत्केरी व्यथा लागेकी राजविराज नगरपालिका–१४ पर्साहीकी बबिता पासवानले पैसा अभावमा जाँच गराउन नसक्दा अस्पतालले भर्ना नलिएपछि सडक पेटीमै छोरा जन्माएकी हुन्।
श्रीमान् हरेराम पासवान र दुई जना सासुका साथ सिटी रिक्सामा अस्पताल पुगेकी बबितालाई प्रसूति विभागकी स्टाफ नर्सले अल्ट्रासाउन्ड र रगत-पिसाब परीक्षणका लागि २,५०० रुपैयाँ लाग्ने बताएकी थिइन्। बबिताले आफू विपन्न भएको र पैसा नभएको बताउँदै जाँचपछि भर्ना गर्न आग्रह गरे पनि नर्सले नमानेको दाबी गरेकी छन्।
अस्पतालले भर्ना नलिएपछि बबिता परिवारसहित बाहिर निस्केर एक औषधि पसल अगाडि पुगेकी थिइन्। त्यहाँ केहीबेरमा उनलाई प्रसव पीडाले च्यापेपछि सँगै गएका महिलाको सहयोगमा शिशुलाई जन्म दिइन्।
घटनाको भिडियो सामाजिक सञ्जालमा भाइरल भएपछि अस्पतालको सेवा र व्यवस्थापनको चर्को आलोचना भएको छ। दोषीलाई कारबाही गर्नुपर्ने माग उठेको छ।
फ्रि हेल्थ सर्भिसको फोकल पर्सन मनोज देवले भने महिला राति २ बजे अस्पताल आएको र आवश्यक स्वास्थ्य परीक्षण नगराएकोले ल्याबमा पठाइएको, तर उनीहरु उतैबाट निस्केको दाबी गरेका छन्। बिहान ५ बजे शिशु जन्मेपछि मात्र अस्पताल आएको र सालनाल काटेर पठाइएको उनको भनाइ छ।
अस्पतालका मेडिकल सुपरिटेन्डेन्ट डा. रञ्जितकुमार झाले आफूले भिडियो हेरेपछि मात्र घटनाबारे थाहा पाएको र महिला बच्चा जन्माइसकेपछि बिहान ४ बजे अस्पतालमा पुगेको जानकारी पाएको बताए। उनले यो घटनाबारे छानबिन गर्न समिति गठन गरिने जानकारी दिए।
यसैबीच, सडकपेटीमा बच्चा जन्माएको घटनाको छानबिन गर्न जिल्ला प्रशासन कार्यालय धनुषाले स्वास्थ्य कार्यालय सप्तरीका प्रमुख डा. सतीशकुमार यादवको संयोजकत्वमा तीन सदस्यीय समिति गठन गरेको छ। समितिलाई सात दिनभित्र प्रतिवेदन पेस गर्न समय दिइएको छ।
सरकारी अस्पतालमा विपन्नका लागि १० प्रतिशत बेड छुट्याउने कानुनी व्यवस्था भए पनि यसरी फुटपाथमा सुत्केरी गराउनुपर्ने घटनाले स्वास्थ्य उपचार प्रणालीमाथि प्रश्न उठाएको छ।
