विराटनगर महानगरपालिकाले सम्भावित भारी वर्षा र विपद् जोखिमलाई मध्यनजर गर्दै नगरभित्रका सबै विद्यालय दुई दिन बन्द गर्ने निर्णय गरेको छ। महानगरको शैक्षिक प्रशासन महाशाखाले असोज ८ र ९ गते विद्यालय बन्द गर्न निर्देशन दिएको हो।
जल तथा मौसम विज्ञान विभागको पूर्वानुमान अनुसार असोज ८ देखि ११ गतेसम्म देशभर भारीदेखि अति भारी वर्षाको सम्भावना छ। यसले खोलानाला तथा नदीमा पानीको बहाव बढ्ने, सडक तथा बस्ती डुबानमा पर्ने र बाटो अवरुद्ध हुने जोखिम छ। विद्यार्थी तथा आम नागरिकको सुरक्षाका लागि विद्यालय बन्द गरिएको महाशाखाले जनाएको छ।
सुरक्षित विद्यालय भवनहरूलाई विपद् प्रभावित नागरिकका लागि अस्थायी आश्रयस्थलको रूपमा प्रयोग गर्न तयारी अवस्थामा राख्न विद्यालयहरूलाई अनुरोध गरिएको छ।
