राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले अर्थमन्त्री डा. स्वर्णिम वाग्लेलाई संसदीय छानबिन समिति गठन गरेर आफूलाई निर्दोष साबित गर्न चुनौती दिएका छन्। बिहीबार सामाजिक सञ्जालमा एक पोस्टमार्फत उनले अर्थमन्त्रीले संसद्मा व्यक्त गरेको भनाइ र शैलीप्रति आपत्ति जनाउँदै यस्तो चुनौती दिएका हुन्।
अर्थमन्त्रीले संसद्मा ‘२ अर्ब होइन, दुई रुपैयाँ मात्रै घोटाला भएको देखाउन’ चुनौती दिएको सन्दर्भलाई उद्धृत गर्दै सांसद शाहीले हिम्मत भए संसदीय छानबिनको सामना गर्न आग्रह गरेका छन्। ‘यदि हिम्मत र दम छ भने संसदीय छानबिन गराएर देखाउनुस्। किन डराउनुभएको छ संसदीय छानबिन समिति बनाउन ?’ उनले प्रश्न गरेका छन्।
सांसद शाहीले संसदीय समिति गठन भएपछि मात्रै को दोषी र को निर्दोष हो भन्ने कुरा जनतासामु छर्लङ्ग हुने दाबी गरे। आफ्नै हात जगन्नाथ गर्ने र जे गरे पनि हुन्छ भन्ने शैली लोकतन्त्रमा स्वीकार्य नहुने भन्दै उनले सत्यता लुकाउनका लागि निष्पक्ष छानबिनबाट नभाग्न अर्थमन्त्रीलाई चेतावनी दिए।
यसैगरी, अर्थमन्त्रीले विगतका फाइलहरू खोल्ने भनी दिएको चेतावनीप्रति प्रतिवाद गर्दै शाहीले सबै फाइल खोल्न चुनौती दिएका छन्। उनले अमेरिकी सहयोग परियोजना (एमसीसी) सम्झौताको फाइल पनि सँगै खोल्नुपर्ने माग अघि सारेका छन्। ‘फाइल खोलौं भनेर धम्की दिनुभएको छ। खोल्नुस् न फाइल, कसले रोकेको छ ? राष्ट्रघाती एमसीसीको फाइल पनि खोलौं,’ शाहीले लेखेका छन्।
एमसीसी सम्झौताको दस्तावेज तयार पार्दा र त्यसलाई संसद्बाट पारित गराउने क्रममा कुन-कुन नेता वा अधिकारीले कति रकम कुम्ल्याए भन्ने तथ्यसहितको विवरण सार्वजनिक हुनुपर्ने उनको जिकिर छ। जनतालाई सत्य जान्ने पूर्ण अधिकार रहेको उल्लेख गर्दै सांसद शाहीले देशमा सुशासन कायम गर्न सबै विषयको निष्पक्ष छानबिन हुनुपर्ने बताए। लोकतन्त्रमा पारदर्शिता, जवाफदेहिता र निष्पक्षता सबैका लागि समान हुनुपर्ने भन्दै उनले सत्ताको बलमा अनुसन्धानबाट उम्किने प्रयास नगर्न चेतावनी दिए।
