काठमाडौँ । टोखा र चन्द्रागिरीमा खाल्डो खनेर लुकाइएको अवस्थामा २ लाख ९ हजार क्याप्सुल ट्रामाडोल बरामद भएको छ। प्रहरीले यस कारोबारमा संलग्न १३ जनालाई पक्राउ गरेको छ।
लागुऔषध नियन्त्रण ब्युरोका एसपी दुर्गाराज रेग्मीका अनुसार जेठ २७ देखि ३१ गतेसम्मको अवधिमा यो कारोबारमा संलग्न व्यक्तिहरू पक्राउ परेका हुन्। बरामद गरिएको ट्रामाडोलको मूल्य करिब ७ लाख ८७ हजार रुपैयाँ बराबरको छ।
पक्राउ पर्नेमा नुवाकोट घर भएका २२ वर्षीय निमा तामाङ, २३ वर्षीय बिक्रम लामा, रुपन्देहीका २९ वर्षीय सागर बुढाथोकी, भक्तपुरका ४५ वर्षीय उद्धव श्रेष्ठ, विकाश काफ्ले, सिन्धुलीकी माया बिसङ्खे, कालिकोटका २६ वर्षीय खड्का रोकाया, २७ वर्षीया कमला थामी, बाजुराकी २९ वर्षीया मेनुका थामी, बाराका ३४ वर्षीय सञ्जय साह सोनार, पर्साका प्रमोद प्रसाद कलवार, काठमाडौँकी ४० वर्षीया मोनिका श्रेष्ठ र २९ वर्षीय सुशीला महर्जन छन्।
उनीहरूको साथबाट २४ सय एम्पुल बुप्रेनोर्फिन, डाइजेपाम र फेनारगनको सेट पनि बरामद गरिएको छ। प्रहरीले यस घटनालाई लागुऔषधको ठूलो कारोबारको रुपमा लिएको छ।
