रसुवाको विनाशकारी बाढीमा सूचना प्रविधि (आईटी) कम्पनी इन्फोसिसको सहायक कम्पनी ‘इन्फोसिस पब्लिक सर्भिसेस’ का प्रमुख कार्यकारी अधिकृत (सीईओ) ल्याक्स गोपिसेट्टीसहित ९ जना दक्षिण कोरियाली नागरिक सम्पर्कविहीन भएका छन्। उनीहरूको खोजी र उद्धारका लागि कोरियाली कम्पनीको टोली रसुवातर्फ प्रस्थान गरेको छ।
इन्फोसिसले गोपिसेट्टी नेपाल भ्रमणका क्रममा रसुवा क्षेत्रमा आएको र सम्पर्कविहीन भएको पुष्टि गरेको छ। कम्पनीले उनको सुरक्षा र कल्याण सुनिश्चित गर्न सम्बन्धित निकायहरूसँग समन्वय गरिरहेको जनाएको छ।
यसैगरी, अपर त्रिशूली–१ जलविद्युत् आयोजनामा कार्यरत दुसान इनर्जिबिलिटी र कोरिया साउथ–इस्ट पावर कम्पनीका ९ जना दक्षिण कोरियाली कर्मचारी पनि बाढीले सम्पर्कविहीन भएका छन्। दुसान इनर्जिबिलिटीका ६ जना र कोरिया साउथ–इस्ट पावरका ३ जना कर्मचारी हालसम्म सम्पर्कमा नआएको दक्षिण कोरियाली सञ्चारमाध्यमले जनाएका छन्।
खोजी तथा उद्धारका लागि कोरियाली कम्पनी दुसान इनर्जिबिलिटी र कोरिया साउथ–इस्ट पावरको टोली व्यवस्थापक सञ्जु पार्कको नेतृत्वमा रसुवा पुगेको छ। नेपाली नागरिक प्रकाश पन्तले यस टोलीलाई सहजीकरण गरिरहेका छन्। पन्तले उद्धार टोली, कम्पनी व्यवस्थापन, स्थानीय पक्ष र सम्बन्धित नेपाली निकायबीच समन्वय गरिरहेका छन्।
श्री एयरलाइन्सको हेलिकप्टरमार्फत रसुवा पुगेको यो टोलीले सम्पर्कविहीन कोरियाली नागरिकसँगै नेपाली नागरिकको समेत खोजी, उद्धार र आवश्यक परे पुरिएका व्यक्तिको उत्खननमा सहयोग गर्ने तयारी गरेको छ।
बाढीले अपर त्रिशूली–१ जलविद्युत् आयोजनाको निर्माणस्थलमा ठूलो क्षति पुर्याएको छ। आयोजनाको माथिल्लो बाँध क्षेत्रको करिब ९० प्रतिशत संरचना बाढीले बगाएको र निर्माणकर्मी बस्ने आधार शिविरको ठूलो हिस्सा ध्वस्त भएको बताइएको छ।
