सर्लाही घटनाको चार दिनमै रौतहटको गरुडा नगरपालिका-९ गम्हरियाका २८ वर्षीय गौतम कुमार सहनीले शरीरमा पेट्रोल खन्याई आत्मदाहको प्रयास गरेका छन्। मंगलबार राति करिब १ बजे उनले आफ्नै शरीरमा आगो लगाएका हुन्।
वडाध्यक्ष राजेश सहनीका अनुसार गौतम केही दिनदेखि मानसिक तनाव र डिप्रेसनबाट पीडित थिए। उनले आफ्नै मोटरसाइकलबाट पेट्रोल निकालेर शरीरमा खन्याई यो कदम चालेको बताए।
गरुडा बजारस्थित झाझ पुल नजिक छाप्रे होटल सञ्चालन गर्दै आएका गौतमले यही व्यवसायबाट तीन छोरा र परिवारको जीविकोपार्जन गर्दै आएका थिए।
आत्मदाहको प्रयासपछि परिवारले उनलाई गरुडास्थित बेटर नेपाल अस्पताल पुर्याएका थिए। प्राथमिक उपचारपछि थप उपचारका लागि काठमाडौँस्थित कीर्तिपुर बर्न अस्पताल पठाइएको इलाका प्रहरी कार्यालय गरुडाले जनाएको छ। उनको शरीरको करिब ३५ प्रतिशत भाग जलेको छ।
गत शुक्रबार सर्लाहीको गोडैता नगरपालिका-१० सिसौटियाका ३५ वर्षीय विवेक मण्डलले पनि आत्मदाहको प्रयास गरेका थिए। उनको शरीरको ८५ प्रतिशत भाग जलेपछि नेपाली सेनाको हेलिकप्टरमार्फत काठमाडौँ लगिएको थियो। उपचारकै क्रममा मंगलबार उनको निधन भएको थियो।
एकपछि अर्को घटनाले मानसिक स्वास्थ्यको समस्या र समयमै उपचारको आवश्यकतालाई थप गम्भीर बनाएको छ। प्रहरीले रौतहट घटनाबारे थप अनुसन्धान गरिरहेको छ।
